CEN- ភ្នំពេញ: ប្រធានលេខាធិការដ្ឋាន គណៈកម្មាធិការជាតិ ប្រយុទ្ធប្រឆាំង ការជួញដូរមនុស្ស បានព្រមានចំពោះ ជនបរទេស ក៏ដូចជា ប្រជាពលរដ្ឋកម្ពុជាខ្លួនឯងផងដែរថា កម្ពុជាមិនមែនជាធុងសំរាម អាពាហ៍ពិពាហ៍ ប្រថុយប្រថានឡើយ ។
លោកស្រី ជូ ប៊ុនអេង រដ្ឋលេខាធិការក្រសួងមហាផ្ទៃ និងជាប្រធានលេខាធិការដ្ឋាន គណៈកម្មាធិការជាតិ ប្រយុទ្ធប្រឆាំង ការជួញដូរមនុស្ស បានមានប្រសាសន៍ នៅព្រឹកថ្ងៃទី២៦ ខែមេសា ឆ្នាំ២០១៤ថា៖ ការរៀបអាពាហ៍ពិពាហ៍ រវាងជនបរទេស និងពលរដ្ឋកម្ពុជា បើប្រៀបធៀប ត្រឹមត្រីមាស ទី១ រយៈពេល ៣ ខែ ឆ្នាំ២០១៤ មានការដាក់ពាក្យ សុំរៀបអាពាហ៍ពិពាហ៍ រវាងជនបរទេស និងពលរដ្ឋកម្ពុជា ៥០០ គូ តែបើប្រៀងធៀបរយៈពេល ត្រីមាសទី១ ឆ្នាំ២០១៣ កន្លងទៅ មានចំនួនតែ ៤០០ គូ ។
បើគិតនៅក្នុងឆ្នាំ២០១៣ កន្លងទៅ ការសុំរៀបអាពាហ៍ពិពាហ៍ រវាងជនបរទេស និងពលរដ្ឋកម្ពុជា មាន ចំនួនដល់ទៅ ១.៧៦៣ គូ។
លោកស្រី ជូ ប៊ុន អេង បានមានប្រសាសន៍បន្តថា៖ ជនបរទេស សុំរៀបការ ជាមួយពលរដ្ឋកម្ពុជា មានជនជាតិអាស៊ី អ៊ឺរ៉ុប អាមេរិក អូស្ត្រាលី។ ចំណែកជនជាតិកូរ៉េ គឺជាជនជាតិ ដែលរៀបអាពាហ៍ពិពាហ៍ជាមួយស្ត្រីកម្ពុជា មានអត្រាខ្ពស់ជាងជនជាតិដទៃ បន្ទាប់ជនជាតិអាមេរិក និងអាណិកជនខ្មែរ នៅអាមេរិក។ បញ្ហាប្រឈម ក្រោយការ រៀបអាពាហ៍ពិពាហ៍ ជាមួយជនបរទេស មានគូស្រករខ្លះ បានបែកគ្នា ប្តឹងលែងលះ ហើយវិលត្រឡប់មកកម្ពុជាវិញ ក្នុងនោះក៏មានអ្នកខ្លះ បន្ទាប់ពីលែងលះគ្នា មកសុំបែបបទរៀបអាពាហ៍ពិពាហ៍ ជាមួយដៃគូថ្មី។
លោកស្រី បានព្រមានថា រាជរដ្ឋាភិបាល ពុំមានគោលការណ៍ឲ្យយកការរៀបការជាមួយជនបរទេស ធ្វើជាឈ្នាន់ សម្រាប់ការស្វែងការរក ការតាំងទីលំនៅ នៅបរទេសទេ។ ការរៀបការប្រថុយប្រថាន គឺជាគ្រោះថ្នាក់ខ្លាំងណាស់ សម្រាប់កូនស្រីខ្មែរ, កម្ពុជាមិនមែនជាធុងសំរាមអាពាហ៍ពិពាហ៍ប្រថុយប្រថានឡើយ៕V/s
No comments:
Post a Comment