គោយន្តរបស់អ្នកមានជម្លោះដីធ្លី ដែលត្រូវអាជ្ញាឃាត់ទុក (រូបថត៖ បូ សាវី)
ដោយ៖ បូ សាវី | ថ្ងៃពុធ ទី23 ខែមេសា ឆ្នាំ2014, ម៉ោង 03:18 PM
យ៉ាងហោចណាស់ គោយន្តប្រមាណ១០គ្រឿង និងពលរដ្ឋជាង១រយនាក់ នៅព្រឹកថ្ងៃពុធនេះ ត្រូវបានអាជ្ញាធរ រារាំង មិនឲ្យធ្វើដំណើរទៅកាន់សាលាខេត្ដសៀមរាប ដើម្បីសុំអន្ដរាគមន៍ពីអភិបាលខេត្ដ ករណីទំនាស់ដីធ្លី ជាមួយយោធាកងពលលេខ៥ និងយោធភូមិភាគទី៤។
អ្នកភូមិទាំងនោះ មានទាំងកូនក្មេង ទាំងមនុស្សចាស់ និងទាំងស្ដ្រីកូនខ្ចី ជិះគោយន្ដចេញពីឃុំស្រែណូយ ស្រុកវ៉ារិន ខេត្ដសៀមរាប ដោយមានយកម្ហូបអាហារតាមមកជាមួយ ប៉ុន្ដែត្រូវបានអាជ្ញាធរខេត្ដ រារាំង និងរក្សាទុកមធ្យោបាយធ្វើដំណើរ នៅពាក់កណ្ដាលផ្លូវ ជាបន្តបន្ទាប់។
តំណាងពលរដ្ឋ នៅឃុំស្រែណូយ ស្រុកវ៉ារិន លោក ភួង សូរិយា ប្រាប់VOD ថា ទោះបីមានការរារាំងពីអាជ្ញាធរក្ដី ក៏ពលរដ្ឋ១២៥នាក់ នៅតែបន្ដធ្វើដំណើរ ទៅកាន់សាលាខេត្ដសៀមរាប រហូតមានដំណោះស្រាយ «ប្រសិនជាការចរចាគ្មានតំណាងកងទ័ព ចុះហត្ថលេខាប្រគល់ដីឲ្យប្រជាពលរដ្ឋទេ ប្រជាពលរដ្ឋនៅតែទៅមុខទៀតអ៊ីចឹង»។
តំណាងពលរដ្ឋមួយរូបទៀត លោក ជា ចាន់ បន្ថែមថា ប្រជាពលរដ្ឋធ្វើដំណើរតាមផ្លូវជួបការលំបាក ដោយសារអាជ្ញាធរ បានដកមធ្យោបាយធ្វើដំណើរ និងស្បៀងអាហារ ដែលទុកនៅលើគោយន្ដនោះ។ យ៉ាងនេះក្ដី លោកថា ពួកគាត់មួយចំនួន បានទៅបណ្ដោះយកគោយន្ដមកតាមក្រោយ និងមួយចំនួនទៀត ដឹកស្ដ្រីមានកូនតូច ធ្វើដំណើរទៅសាលាខេត្ដសៀមរាប ដើម្បីសុំអន្ដរាគមន៍ពីអភិបាលខេត្ដលោក ឃឹម ប៊ុនសុង «អ្នកកូនតូច ឬក៏ចាស់ជរាអី មានម៉ូតូពីរបីសម្រាប់ចល័ត ចល័តយកមកបណ្តាក់ខាងមុខៗ ដើម្បីបណ្តោះគ្នាមក។ គោលបំណង ទៅឲ្យដល់សាលាខេត្តសៀមរាប ប៉ុន្តែយើងមិនអាចសន្និដា្ឋនបានថា ឆ្លងកាត់ដំណាក់កាលទី៥ហ្នឹង រួចឬអត់ទេបង។ ប្រសិនជាមានដំណោះស្រាយ ដែលប្រជាជនទាំងអស់គ្នាឯកភាព អាចស្ងប់អារម្មណ៍ទាំងអស់គ្នាបាន នោះអាចត្រឡប់ទៅវិញ»។
VOD មិនទាន់អាចទាក់ទងអាជ្ញាធរខេត្ដ ដើម្បីសុំការអត្ថាធិបាយ ពីករណីនេះ បាននៅឡើយទេ។ ប៉ុន្ដែពលរដ្ឋឲ្យដឹងថា អភិបាលរងខេត្ដសៀមរាប លោក ប៊ុនថាឬទ្ធិ ចុះដោះស្រាយត្រង់ចំណុចស្រុកបន្ទាយស្រី។
ទោះជាយ៉ាងណា ការរារាំង និងទប់ស្កាត់ពលរដ្ឋនេះ មិនមានអំពើហិង្សាកើតឡើងនោះទេ ដោយគ្រាន់តែប៉ះពាល់ពាក្យសម្ដី និងប្រទាញប្រទង់គ្នាបន្ដិចបន្តួច ខណៈសមត្ថកិច្ចដកយកយកសម្ភារៈ និងពន្លត់ម៉ាស៊ីនគោយន្ដពួកគេ។
អ្នកសម្របសម្រួលអង្គការ លីកាដូ ប្រចាំខេត្ដសៀមរាប លោក នូ ពុទ្ធិ កត់សម្គាល់ថា អាជ្ញាធរតែងរារាំងពួកគេជាបន្ដបន្ទាប់ ដោយបារម្ភខ្លាចអាម៉ាស់ដល់ខ្លួន ដោយលើកហេតុផលប៉ះពាល់សណ្ដាប់ធ្នាប់នៅតំបន់ទេសចរណ៍។ លោកថា ករណីនេះ ជារឿងសាមញ្ញនៅក្នុងសង្គមខ្មែរនាពេលបច្ចុប្បន្ន ខណៈដែលពលរដ្ឋស្វែងរកដំណោះស្រាយពីថ្នាក់ដឹកនាំរបស់ពួកគាត់។
ទំនាស់ដីធ្លីនេះ កើតឡើងនៅដើមឆ្នាំ២០១៣ ជាមួយយោធាកងពលលេខ៥ និងយោធភូមិភាគទី៤ ដែលមានផ្ទៃដីទំហំជិត៧រយហិកតា ដោយមានពលរដ្ឋរស់នៅចំនួនជាង១២៥គ្រួសារ ស្ថិតនៅឃុំស្រែណូយ ស្រុកវ៉ារិន។ បើតាមពលរដ្ឋឲ្យដឹងថា ពួកគេបានត្រឡប់ទៅគេហដ្ឋានវិញហើយ នៅរសៀលថ្ងៃដដែលនេះ បន្ទាប់អាជ្ញាធរស្កាត់ជួប ដោយធ្វើកិច្ចសន្យា នឹងទៅដោះស្រាយជូនពួកគេ នៅថ្ងៃស្អែកនេះ៕
No comments:
Post a Comment