ដោយ៖ តាំង វីដា | ថ្ងៃចន្ទ ទី31 ខែមិនា ឆ្នាំ2014, ម៉ោង 05:37 PM
អនុប្រធានគណបក្សសង្គ្រោះជាតិ ស្នើឲ្យថ្នាក់ដឹកនាំគណបក្សប្រជាជនកម្ពុជា បង្ហាញពីឆន្ទៈពិតលើសំណើឲ្យមានជំនួបកំពូល ដើម្បីកំណត់លក្ខខណ្ឌជាមុន សម្រាប់ឲ្យក្រុមការងារគណបក្សទាំងពីរបន្តកិច្ចចរចា លើកំណែទម្រង់ប្រព័ន្ធបោះឆ្នោតបន្តទៀត។
ក្នុងកម្មវិធីតុមូលរបស់វិទ្យុវីអូឌី នៅរសៀលថ្ងៃចន្ទនេះ អនុប្រធានគណបក្សសង្គ្រោះជាតិ លោក កឹម សុខា មានប្រសាសន៍ថា ជំនួបចរចាកំពូល មានសារៈសំខាន់ណាស់ សម្រាប់ជាកិច្ចតម្រង់ទិសឲ្យក្រុមការងារគណបក្សទាំងពីរ បន្តកិច្ចចរចា ដោយហេតុថា របៀបវារៈដែលក្រុមគណៈកម្មការបក្សទាំងពីរលើកឡើង គឺសុទ្ធតែហួសដែនសម្រេចរៀងៗខ្លួន ដែលនាំឲ្យមានផលវិបាកក្នុងការបន្តកិច្ចចរចា។ លោកថា គណបក្សនេះ ចង់ឲ្យមានជំនួបកំពូលពិភាក្សាជាអទិភាព លើការស៊ើបអង្កេតការបោះឆ្នោត ឬការកំណត់កាលបរិច្ឆេទបោះឆ្នោតឡើងវិញ និងការដាក់ គជប ជាស្ថាប័នធម្មនុញ្ញ។
លោក កឹម សុខា បន្តថា គណបក្សនេះ បានចាត់តាំង លោក សុន ឆ័យ ប្រធានក្រុមការងារបច្ចេកទេសចរចា និងជាប្រធានគណៈកម្មការចម្រុះកែទម្រង់ការបោះឆ្នោត រង់ចាំជួបជាមួយលោក ព្រុំ សុខា ប្រធានក្រុមការងារគណបក្សប្រជាជនកម្ពុជា ដើម្បីសម្របសម្រួលឲ្យមានជំនួបកំពូល។
ប៉ុន្តែ លោក ព្រុំ សុខា បដិសេធឆ្លើយ ដោយអះអាងជាប់រវល់។ មន្ត្រីជាន់ខ្ពស់គណបក្សកាន់អំណាច លោក ឈាង វុន ធ្លាប់ឲ្យដឹងដែរថា ជំនួបកំពូលនៃគណបក្សទាំងពីរ អាចធ្វើទៅបាន លុះណាតែគណៈកម្មការចម្រុះកែទម្រង់ការបោះឆ្នោតគណបក្សទាំងពីរ អាចសម្រេចការងារជាលទ្ធផលនៃជំនួបកំពូល កាលពីថ្ងៃទី១៦ និង១៧ ខែកញ្ញា ឆ្នាំ២០១៣ ជាមុនសិន។
អ្នកវិភាគនយោបាយ លោកបណ្ឌិត សុខ ទូច ស្នើឲ្យថ្នាក់ដឹកនាំគណបក្សទាំងពីរ បង្ហាញឆន្ទៈពិត ពន្លឿនការដោះស្រាយបញ្ហានយោបាយ។ លោកយល់ថា បើនៅតែមិនមានជំនួបកំពូល គណបក្សទាំងពីរ គប្បីស្វែងរកយុទ្ធសាស្ត្រ ដើម្បីរកច្រកចេញពីភាពជាប់គាំងនេះ។
ក្រោមស្មារតីនៃជំនួបកំពូលរបស់ថ្នាក់ដឹកនាំបក្សទាំងពីរ កាលពីថ្ងៃទី១៦ និង១៧ ខែកញ្ញា ក្រុមការងារបច្ចេកទេសចរចា និងក្រុមគណៈកម្មការចម្រុះកែទម្រង់ការបោះឆ្នោតបក្សទាំងពីរ បានចាប់ផ្តើមកិច្ចចរចាជាបន្តបន្ទាប់ ដែលបង្ហាញពីភាពខិតចូលគ្នា ដោយមានរបៀបវារៈរៀងៗខ្លួន ប៉ុន្តែកិច្ចចរចានេះ ត្រូវបានផ្អាក កាលពីថ្ងៃទី ២៤ ខែមីនា បន្ទាប់ពីក្រុមការងារគណៈកម្មការមកពីគណបក្សប្រជាជនកម្ពុជា បដិសេធសំណើររបស់ក្រុមការងារគណៈកម្មការគណបក្សសង្គ្រោះជាតិ ដែលទាមទារឲ្យកំណត់កាលបរិច្ឆេទការបោះឆ្នោតឡើងវិញ និងការដាក់ គជប ជាស្ថាប័នធម្មនុញ្ញ ដោយថា សំណើរនេះទុកឲ្យថ្នាក់ដឹកនាំកំពូលជាអ្នកសម្រេច៕
សូមសរសេរមកលោក តាំង វីដា តាមរយៈ vida@vodhotnews.com
No comments:
Post a Comment