លោក អ៊ុំ សំអាន ថារដ្ឋាភិបាល ប្រើផែនទីបោះបង្គោល ខុសគ្នានឹងផែនទីផ្ទៀងផ្ទាត់
VOD news, ដោយ ឡាយ សាមាន | ថ្ងៃសៅរ៍ ទី26 កញ្ញា 2015តំណាងរាស្ត្រគណបក្សសង្គ្រោះជាតិ ដែលកំពុងស្ថិតនៅក្រៅប្រទេស បាន លើកឡើងថា រដ្ឋាភិបាលប្រើផែនទីបោនខ្នាត ១/១០០.០០០ ទៅផ្ទៀងផ្ទាត់ជាមួយផែនទី ដែលខ្ចីមកពី បរទេស តែលោកថា ពេលបោះបង្គោលព្រំដែន ប្រើផែនទីខ្នាតផ្សេង។
លោក អ៊ុំ សំអាន ដែលកំពុងស្ថិតនៅអាមេរិក បានសរសេរក្នុងបណ្តាញាសង្គមហ្វេសប៊ុក របស់លោកថា ពេលផ្ទៀងផ្ទាត់ផែនទី រដ្ឋាភិបាល ប្រើផែនទីបោន ខ្នាត ១/១០០.០០០ ប៉ុន្តែពេលបោះបង្គោល ប្រើផែនទី UTM ខ្នាត ១/៥០.០០០។ លោកបន្តថា រដ្ឋាភិបាលប្រើផែនទី UTM ខ្នាត ១/៥០.០០០ ចំនួន ៤០ ផ្ទាំង អមសន្ធិសញ្ញាឆ្នាំ១៩៨៥ (ទំព័រ១២ នៃសន្ធិសញ្ញា ឆ្នាំ១៩៨៥ និងប្រការ៣ ចំណុច២ នៃសន្ធិសញ្ញាបំពេញបន្ថែម ឆ្នាំ២០០៥) និងផែនទី UTM ខ្នាត ១/៥០.០០០ ចំនួន២៦ផ្ទាំង (ចម្លងខ្សែព្រំដែនពីផែនទីបោនខ្នាត ១/១០០.០០០ មកលើផែនទី UTM ខ្នាត ១/៥០.០០០)។ លោកបន្ថែមថា ផែនទីទាំងនេះ ផ្ទុយមាត្រា២ នៃរដ្ឋធម្មនុញ្ញ ដែលតម្រូវឲ្យប្រើផែនទីខ្នាត ១/១០០.០០០។
ទាក់ទងនឹងការលើកឡើងនេះ អនុប្រធានគណៈកម្មាធិការព្រំដែនកម្ពុជា លោកស្រី កុយ ពិសី សុំមិនអត្ថាធិប្បាយលើបញ្ហនេះ ដោយបញ្ជាក់ថា កន្លងទៅលោកនាយករដ្ឋមន្ត្រី ហ៊ុន សែន បកស្រាយរួចអស់ហើយ។
សូមរំឮកថា កន្លងទៅអង្គការសហប្រជាតិ និងប្រទេសបារាំង ព្រមឲ្យកម្ពុជាខ្ចីផែនទី ដើម្បីយកមកផ្ទៀងផ្ទាត់ជាមួយផែនទីរបស់រដ្ឋាភិបាលដែលកំពុង ប្រើប្រាស់សព្វថ្ងៃ តាមការស្នើសុំរបស់លោក ហ៊ុន សែន។ ក្រោយការផ្ទៀងផ្ទាត់ទាំងពីរលើក មន្ត្រីរដ្ឋាភិបាល អះអាងថា ផែនទីទាំងនោះគឺដូចគ្នាទៅនឹងផែនទីរបស់រដ្ឋាភិបាល។ចំណែក លោកនាយករដ្ឋមន្ត្រី ហ៊ុន សែន ព្រមានថា នឹងចាប់ខ្លួនចំពោះជនណាមួយដែលនិយាយថា រដ្ឋាភិបាលកំពុងប្រើផែនទីក្លែងក្លាយសម្រាប់ការងារព្រំដែន៕
No comments:
Post a Comment