ដោយ៖ ម៉ៅ ចរិយា | ថ្ងៃអង្គារ ទី18 ខែមិនា ឆ្នាំ2014 | 45 នាទី មុន
សមាជិកព្រឹទ្ធសភាគណបក្សប្រជាជនកម្ពុជា សោកស្តាយចំពោះការចោទប្រកាន់របស់គណបក្សសម រង្ស៊ី មកលើគណបក្ស ពីទង្វើអុកឡុក និងរំខានលើវេទិកាសំណេះសំណាលជាមួយអ្នកគាំទ្ររបស់គណបក្សសង្គ្រោះជាតិ ក្នុងខេត្តតាកែវ កាលពីកន្លងទៅ។
សមាជិកព្រឹទ្ធសភាគណបក្សប្រជាជនកម្ពុជា ចាត់ទុកការចោទប្រកាន់នេះថាគ្មានមូលដ្ឋានពិតប្រាកដ។ សេចក្តីថ្លែងការណ៍របស់គណបក្សប្រជាជនកម្ពុជា ចុះថ្ងៃទី១៧ខែមីនា ឲ្យដឹងថា សមាជិកព្រឹទ្ធសភាខាងគណបក្សប្រជាជនកម្ពុជា ក៏ដូចជាគណបក្សប្រជាជនកម្ពុជា តែងបានគោរពយ៉ាងខ្ជាប់ខ្ជួននូវរដ្ឋធម្មនុញ្ញ និងច្បាប់នានា ក្នុងនោះមានទាំងសេរីភាពខាងការបញ្ចេញមតិរបស់ប្រជាពលរដ្ឋ ដែលបានប្រព្រឹត្តទៅស្របតាមច្បាប់ជាធរមាន។
កាលពីថ្ងៃទី១៧ ខែមីនា សមាជិកព្រឹទ្ធសភាគណបក្សសមរង្ស៊ី (SRP) បានអំពាវនាវឲ្យគណបក្សប្រជាជនកម្ពុជា(CPP) បញ្ឈប់ជាបន្ទាន់ចំពោះទង្វើអុកឡុក និងរំខាន លើវេទិកាសំណេះសំណាលជាមួយអ្នកគាំទ្ររបស់គណបក្សសង្គ្រោះជាតិ។
សេចក្តីថ្លែងការណ៍របស់សមាជិកព្រឹទ្ធសភាមកពីគណបក្សសម រង្ស៊ី ចាត់ទុកការប្រើប្រាស់ឧបករណ៍បំពងសំឡេង ការអុកឡុក និងរំខានវេទិការបស់គណបក្សសង្គ្រោះជាតិ កាលពីថ្ងៃទី១៥ ខែមីនា នៅភូមិលាយឡ ឃុំត្រាំកក់ ខេត្តតាកែវ ពីសំណាក់គណបក្សប្រជាជនកម្ពុជាខេត្តតាកែវ ថាជាទង្វើរំលោភច្បាប់រដ្ឋធម្មនុញ្ញ ដែលអនុញ្ញាតឲ្យប្រជាពលរដ្ឋមានសេរីភាពបញ្ចេញមិត និងសេរីភាពជួបប្រជុំ។
សេចក្តីថ្លែងការណ៍ បន្តដោយថ្កោលទោស និងអំពាវនាវឲ្យគណបក្សប្រជាជនកម្ពុជា បញ្ឈប់ជាបន្ទាន់នូវទង្វើអុកឡុក និងរំខានទៅលើគណបក្សសង្គ្រោះជាតិ តទៅទៀត និងស្នើឲ្យសហគមន៍ជាតិ-អន្តរជាតិ ជួយតាមដានចំពោះទង្វើនេះ។
កាលពីថ្ងៃទី១៥ ខែមីនា ថ្នាក់ដឹកនាំគណបក្សសង្គ្រោះជាតិ បានចុះជួបសំណេះសំណាលជាមួយអ្នកគាំទ្រ និងសកម្មជនរបស់ខ្លួន នៅឃុំត្រាំកក់ ស្រុកត្រាំកក់ និងឃុំរវៀង ស្រុកសំរោង ខេត្តតាកែវ ប៉ុន្តែមានការរំខានដោយចាក់មេក្រូបំពងសំឡេង ពីអ្នកគាំទ្រគណបក្សប្រជាជនកម្ពុជាបីទិស។
តែទោះជាយ៉ាងណា ថ្នាក់ដឹកនាំគណបក្សសង្គ្រោះជាតិ នៅតែបន្តសំណេះសំណាលជាមួយអ្នកគាំទ្ររបស់ខ្លួន រហូតចប់កម្មវិធី និងមិនមានការប៉ះទង្គិចរវាងក្រុមអ្នកគាំទ្រទាំងពីរឡើយ៕
សរសេរមកកាន់កញ្ញា ម៉ៅ ចរិយា តាមរយៈ chakriyamao168@gmail.com
No comments:
Post a Comment