សេចក្តីប្រកាសព័ត៌មាន របស់ការិយាល័យអង្គការសហប្រជាជាតិ ឲ្យដឹងថា ក្នុងដំណើរទស្សនកិច្ចនេះ លោក ម៉េណា គីអេ នឹងជួបជាមួយតំណាងអង្គការសង្គមស៊ីវិល សកម្មជនការងារ សហជីព និងអ្នកពាក់ព័ន្ធដទៃទៀត ដើម្បីពិភាក្សាអំពីស្ថានភាពសិទ្ធិសេរីភាពក្នុងការជួបប្រជុំដោយ សន្តិវិធី និងសេរីភាពក្នុងការបង្កើតសមាគមក្នុងប្រទេសកម្ពុជា។
លោក អំ សំអាត ប្រធានក្រុមស៊ើបអង្គេតអង្គការការពារសិទ្ធិមនុស្សលីកាដូ នៅថ្ងៃចន្ទនេះ បានចាត់ទុកវត្តមាន របស់មន្ត្រីអង្គការសហប្រជាជាតិ ធ្វើទស្សនកិច្ចមកកម្ពុជាថា បានផ្តល់សារៈសំខាន់បំផុតដល់ការជម្រុញឲ្យមានការគោរពសិទ្ធិមនុស្ស និងសិទ្ធិផ្សេងៗទៀតនៅកម្ពុជា។
យ៉ាងណាក៏ដោយ សេចក្តីប្រកាសព័ត៌មាន មិនបានបញ្ជាក់ថា អ្នករាយការណ៍ពិសេសអង្គការសហប្រជាជាតិ រូបនេះ អាចនឹងមានគំរោងចូល ជួបជាមួយមន្ត្រីរដ្ឋាភិបាល ឬមេដឹកនាំគណបក្សប្រឆាំង ឬបែបណានៅឡើយទេ។
ទស្សនកិច្ចនេះ ស្របពេល ថ្នាក់ដឹកនាំរដ្ឋាភិបាលកម្ពុជា បានចេញបទបញ្ជា មិនឲ្យប្រជាពលរដ្ឋ ឬអ្នកពាក់ព័ន្ធផ្សេងៗ មិនឲ្យធ្វើការប្រមូលផ្តុំគ្នាសម្ដែងមតិ ឬធ្វើការតវ៉ាផ្សេងៗ និងបន្ទាប់ពីមានការវាយបំបែកការប្រមូលផ្តុំ របស់ប្រជាពលរដ្ឋ សកម្មជនសហជីព និងមន្ត្រីសិទ្ធិមនុស្ស ជាបន្តបន្ទាប់កន្លងមកនេះ៕
No comments:
Post a Comment