ក្រុមលោក សុខ ទូច កំពុងពិនិត្យមើលបង្គោលព្រំដែនមួយដែលបោះដោយបារាំង។ រូបថត ហ្វេសប៊ុក
មន្ត្រីថា បង្គោលព្រំដែន បោះដោយបារាំង មិនអាចទទួលយកទាំងស្រុងបានទេ
ភ្នំពេញៈ មន្ត្រីជាន់ខ្ពស់របស់រដ្ឋាភិបាលទទួលបន្ទុកកិច្ចការព្រំដែនបាន បញ្ជាក់កាលពីម្សិលមិញ ថា បង្គោលព្រំដែនចាស់ចំនួន ១២៤ ដែលបានបោះដោយអាណានិគមបារាំង មិនអាចទទួលយកទាំងស្រុងបានទេ ហើយ ដំណើរការបោះបង្គោលព្រំដែនបច្ចុប្បន្ន ក៏មិនអាចធ្វើនៅលើ ទីតាំងចាស់ទាំងអស់បានដែរ ដោយសារតែបារាំង បានកែប្រែខ្សែបន្ទាត់ព្រំដែន ជាច្រើនដង។
លោកស្រី កុយ ពិសី អនុប្រធានគណៈកម្មាធិការព្រំដែន របស់រដ្ឋាភិបាល បានប្រាប់ភ្នំពេញប៉ុស្តិ៍កាលពីម្សិលមិញថា បង្គោលព្រំដែនចាស់ចំនួន ១២៤ គឺសម្រាប់កំណត់បង្គោលព្រំដែន រវាងកម្ពុជា និងកូសាំងស៊ីន ព្រោះបារាំង មិនគិតថាទឹកដីកម្ពុជាជា ទឹកដីបារាំង ទេ គេគិតថា កូសាំងស៊ីន ជាទឹកដីពួកគេ ដូច្នេះប្រសិនបើបារាំង ចង់បាន តំបន់ណា បារាំង ផ្លាស់ប្តូរតំបន់នោះ ទៅជាកូសាំងស៊ីន ហើយម្យ៉ាងទៀត បារាំងបានកែប្រែខ្សែបន្ទាត់ព្រំដែនជាច្រើនដង ហើយ បង្គោលមួយចំនួន បានបាត់បង់ និងមួយចំនួនទៀត មិនត្រូវតាមខ្សែបន្ទាត់ព្រំដែននោះទេ។
ការអះអាងរបស់លោកស្រី កុយ ពិសី បានធ្វើឡើងបន្ទាប់ពីលោក អ៊ុំ សំអាន តំណាងរាស្រ្តគណបក្សសង្គ្រោះជាតិ បានជំរុញឱ្យរដ្ឋាភិបាល បោះបង្គោល ព្រំដែន ជាមួយវៀតណាម នៅលើទីតាំងចាស់ នៃបង្គោលព្រំដែនចំនួន ១២៤ ដែលបានបោះដោយអ្នកជំនាញបារាំង ដោយ អះអាងថា ប្រសិនបើរដ្ឋាភិបាល មិន បានបោះបង្គោលថ្មី លើទីតាំងចាស់ដដែលទេនោះ វានឹងធ្វើឲ្យពលរដ្ឋ រស់នៅតាមបណ្តោយព្រំដែន នៅតែជួបបញ្ហា បាត់បង់ដីស្រែ។
លោកស្រី កុយ ពិសី បានថ្លែងថា៖ «លោក អ៊ុំ សំអាន ចង់ឲ្យរដ្ឋាភិបាល បោះបង្គោលព្រំដែន តាមបង្គោលចាស់ យើងធ្វើកិច្ចការ នេះ យូរហើយ លោក អ៊ុំ សំអាន មិនបាច់ប្រាប់រដ្ឋាភិបាល ឲ្យធ្វើនេះធ្វើនោះទេ។ ដូច្នេះយើង បានធ្វើការជារៀងរាល់ថ្ងៃ បើសិនជាបង្គោលណាមួយត្រូវ នឹងខ្សែបន្ទាត់ព្រំដែន បច្ចុប្បន្ន យើងនឹងទទួលយក។ យើង ដកអាចាស់ចេញ ហើយដាក់អាថ្មី ជំនួស ដោយបង្គោលថ្មី»។ លោកស្រី បានលើកឡើងថា៖ «វាមិនដូចមុនទាំងអស់ទេ មានបង្គោលខ្លះ នៅសល់។ មានខ្លះ បាត់បង់ មានខ្លះ ត្រូវខ្សែបន្ទាត់ព្រំដែន មានខ្លះ មិនត្រូវ »។
លោកស្រីបានសង្កត់ធ្ងន់ថា មូលហេតុដែលរដ្ឋាភិបាលមិនអាចអនុវត្ត តាមបង្គោលព្រំដែនទាំងនោះ ព្រោះរដ្ឋាភិបាល ធ្វើការលើបញ្ហាព្រំដែន ផ្អែកលើផែនទី Bonne 1/100 000 ជាមូលដ្ឋាន ដែលទទួលស្គាល់ដោយសហគមន៍អន្តរជាតិ ហើយថា បើទោះបីជា បង្គោលចំនួន ១២៤ បានបោះរួចហើយក្តី ប៉ុន្តែបង្គោលខ្លះ មិនត្រូវខ្សែបន្ទាត់ព្រំដែន ទេ ដោយសារតែមានការផ្លាស់ប្តូរ ខ្សែបន្ទាត់ព្រំដែន។ ទាក់ទងនឹងសំណើរបស់ លោក សំអាន ជំរុញឲ្យរដ្ឋាភិបាលបង្កើត ឧត្តមក្រុមប្រឹក្សាជាតិធ្វើការលើបញ្ហា ព្រំដែន និងក្រោមព្រះរាជាធិបតីព្រះមហាក្សត្រ លោកស្រី កុយ ពិសី បានច្រានចោលនូវសំណើនេះ ដោយលោកស្រី បានលើកឡើងថា ក្រុមប្រឹក្សា នេះមិនអាចបង្កើត ហើយឲ្យសង្គមស៊ីវិល និងគណបក្សប្រឆាំង ចូលរួមបានទេ ព្រោះរដ្ឋាភិបាល មិនបានបង្កើត រដ្ឋាភិបាលចម្រុះជាមួយនឹង គណបក្សប្រឆាំង និងសង្គមស៊ីវិលឡើយ។
នាពេលថ្មីៗនេះ លោក អ៊ុំ សំអាន តំណាងរាស្រ្តគណបក្សសង្គ្រោះជាតិ ដែលកំពុងបំពេញបេសកកម្មនៅសហរដ្ឋ អាមេរិក ដើម្បីស្រាវជ្រាវរកផែនទីកម្ពុជា បានបញ្ជាក់ថា បង្គោលព្រំដែន ចំនួន ១២៤ បានបោះដោយអ្នកជំនាញបារាំងនៅឆ្នាំ ១៨៧៣ រវាងកម្ពុជា និងកូសាំងស៊ីន គឺជាបង្គោលផ្លូវការ។ លោក អ៊ុំ សំអាន ក៏បានបញ្ជាក់ផងដែរថា បង្គោលព្រំដែនចាស់ ភាគច្រើន បានបាត់បង់ដោយ លោក ថ្លែងថា បង្គោលខ្លះ អាចបំផ្លាញដោយវៀតណាម ដើម្បីបោះបង្គោលថ្មីហើយ បង្គោល ខ្លះទៀត អាចបាត់បង់ដោយសារតែបញ្ហាពុកផុយ។ លោក បានឲ្យដឹងទៀតថា ក្នុងឆ្នាំ ១៩៨៦ និង ១៩៨៨ កម្ពុជា និងវៀតណាម បានបោះបង្គោលព្រំដែនចំនួន ៧២ បង្គោលតាមសន្ធិសញ្ញាឆ្នាំ ១៩៨៥ នៅពេលកម្ពុជាស្ថិតក្រោម ការគ្រប់គ្រងរបស់វៀតណាម ហើយនៅឆ្នាំ ២០០៦ ភាគីទាំងពីរបានចាប់ផ្តើមបោះឡើងវិញបាន ៨៣% រហូតមកដល់ពេលនេះ ដោយយោងតាមសន្ធិសញ្ញាបំពេញបន្ថែមឆ្នាំ ២០០៥។ លោក សំអាន បានទាក់ទងមកភ្នំពេញប៉ុស្តិ៍កាលពីម្សិលមិញហើយ បានគូសបញ្ជាក់ជាថ្មី ទៀតថាបារាំង បានបោះបង្គោលព្រំដែនចំនួន ១២៤ បង្គោល ហើយក្រោយមកទើបបារាំង ធ្វើផែនទីខ្នាត ១/១០០ ០០០ ក្នុងឆ្នាំ ១៩៣៣-១៩៥៣។ លោក បញ្ជាក់ថា៖ «បារាំងធ្វើផែនទី យោងតាមការបោះបង្គោលព្រំដែន ដូច្នេះការនិយាយថា បារាំង កែប្រែខ្សែបន្ទាត់ព្រំដែនជាច្រើនដង វាមិនត្រឹមត្រូវទេ»។
លោក សុខ ទូច ប្រធានក្រុមស្រាវជ្រាវបញ្ហាព្រំដែននៃ រាជបណ្ឌិត្យសភាកម្ពុជាបាន បញ្ជាក់កាល ពីម្សិលមិញថាលោកបានរកឃើញបង្គោលព្រំដែនចាស់ចំនួន ៦ ដែលបានបោះដោយបារាំង ហើយថាលោកនឹងព្យាយាមរកបង្គោលទាំង ១២៤ នោះដោយត្រូវការរយៈពេល ២ ឆ្នាំ សម្រាប់បេសកកម្ម របស់លោក។ នៅពេលសួរថា តើរដ្ឋាភិបាលនឹងបោះបង្គោលថ្មី លើទីតាំងបង្គោលចាស់ឬ យ៉ាងណា? លោក ទូច បញ្ជាក់ថា ផ្អែកតាមច្បាប់ រដ្ឋាភិបាល ត្រូវតែបោះបង្គោលថ្មីលើ ទីតាំងបង្គោលចាស់៕ TK
No comments:
Post a Comment