VOD- ដោយ៖ ណាត សុភាព |
ថ្ងៃអាទិត្យ ទី9 ខែកុម្ភៈ ឆ្នាំ2014, ម៉ោង 03:59 PM
មន្ត្រីសាលាខេត្តស្វាយរៀង នៅថ្ងៃអាទិត្យនេះ បដិសេធសំណើសុំកិច្ចអន្តរាគមន៍ពីប្រជាពលរដ្ឋ ដែលសុំដោះលែងអ្នកជាប់ឃុំ២១នាក់ នៅខេត្តកំពង់ចាម ដោយអះអាងថា ការស្នើនោះហួសដែនសមត្ថកិច្ច។
មន្ត្រីតស៊ូមតិនៃសម្ព័ន្ធសហគមន៍កសិករលោក ស៊ុម ម៉ាណែត ថ្លែងថា លោក រួមជាមួយប្រជាពលរដ្ឋប្រមាណ១០០នាក់ បានយកញត្តិទៅដាក់នៅសាលាខេត្តនោះ ទាមទារឲ្យរដ្ឋាភិបាលពិចារណា ដោះលែងកម្មករ និងសកម្មជនសិទ្ធិមនុស្ស២១នាក់ ដែលកំពុងជាប់ឃុំនៅពន្ធនាគារត្រពាំងផ្លុង ក្នុងខេត្តកំពង់ចាម។ ប៉ុន្តែត្រូវបាននាយករងរដ្ឋបាលខេត្ត លោក សេង សីលា និងនាយកអន្តរវិស័យសាលាខេត្តស្វាយរៀងលោក សុខ សែ មិនព្រមទទួលយកញត្តិនោះទេ ដោយឲ្យប្រជាពលរដ្ឋយកទៅដាក់នៅរាជធានីភ្នំពេញវិញ។
លោក ស៊ុម ម៉ាណែត សំដែងការខកចិត្ត និងរិះគន់មន្ត្រីសាលាខេត្តទាំងនោះថា អសមត្ថភាព និងកម្សោយក្នុងការដឹកនាំផងដែរ។
នៅក្នុងញត្តិនោះ ក្រៅពីទាមទារឲ្យដោះលែងកម្មករ និង សកម្មជនសិទ្ធិមនុស្ស ក៏ទាមទារឲ្យមានការដំឡើងប្រាក់ខែគោលដល់កម្មករ លើគ្រប់វិស័យឲ្យបាន១៦០ដុល្លារក្នុងមួយខែ និង ទាមទារឲ្យរដ្ឋាភិបាលបញ្ឈប់ការប្រើកម្លាំង បាញ់បង្ក្រាបលើបាតុកម្មដោយសន្តិវិធីទៀត៕
No comments:
Post a Comment