ដោយ៖ តាំង វីដា | ថ្ងៃចន្ទ ទី10 ខែកុម្ភៈ ឆ្នាំ2014 | 36 នាទី មុន
VOD
មន្ត្រីអង្គការសង្គមស៊ីវិល
អំពាវនាវដល់ប្រជាពលរដ្ឋខ្មែរទូទាំងប្រទេស
បញ្ឈប់ការប្រើប្រាស់ផលិតផលវៀតណាម ដោយសារស្ថានទូតវៀតណាម
មិនអើពើនឹងការស្នើសុំអន្តរាគមន៍របស់សង្គមស៊ីវិល
ចំពោះបញ្ហាសិទ្ធិមនុស្សនៅកម្ពុជា។
ការអំពាវនាវនេះ ធ្វើឡើងបន្ទាប់ពីស្ថានទូតវៀតណាមប្រចាំនៅកម្ពុជា
នៅព្រឹកថ្ងៃចន្ទនេះ
បានបដិសេធទទួលញត្តិរបស់មន្ត្រីអង្គការសង្គមស៊ីវិលប្រមាណ ៥០នាក់
តំណាងឲ្យសង្គមស៊ីវិលជាង១៤០អង្គការ ដែលស្នើឲ្យមន្ត្រីស្ថានទូតនេះ
អន្តរាគមន៍ដោយដាក់សម្ពាធរដ្ឋាភិបាលកម្ពុជា និងតុលាការ
ដោះលែងជនជាប់ឃុំទាំង២១នាក់ នៅពន្ធនាគារត្រពាំងផ្លុង
និងលើកលែងការចោទប្រកាន់លើជនត្រូវចោទ២៣នាក់
ក្នុងហេតុការណ៍ប៉ះទង្គិចកាលពីថ្ងៃទី២ និងទី៣ខែមករា។
ក្រោយពីបដិសេធទទួលយកញត្តិ អាជ្ញាធរខណ្ឌចំការមន
មិនបង្ហាញអត្តសញ្ញាណមួយរូប បានមកសំណូមពរឲ្យប្រជាពលរដ្ឋ
និងមន្ត្រីសង្គមស៊ីវិល បញ្ឈប់ការប្រមូលផ្តុំខាងមុខទូត ដោយអះអាងថា
នេះជាសំណូមរបស់ស្ថានទូតនេះ។
នាយកលេខាធិការដ្ឋាននៃក្រុមការងារពិសេសសិទ្ធិលំនៅដ្ឋាន លោក សៀ
ភារម្យ យល់ថា ការមិនទទួលយកញត្តិនេះ គឺជាសិទ្ធិរបស់ប្រទេសវៀតណាម
ប៉ុន្តែក្នុងនាមជាប្រទេសជិតខាង និងជាសមាជិកនៃសហគមន៍អាស៊ាន វៀតណាម
គប្បីបង្ហាញពីការយកចិត្តទុកដាក់ ទទួលយកការពឹងពាក់ពីប្រទេសជា
មិត្ត។ លោកអំពាវនាវឲ្យប្រជាពលរដ្ឋ ចូលរួមដាក់សម្ពាធប្រទេសវៀតណាម
ដោយឈប់ប្រើប្រាស់ផលិតផល របស់ប្រទេសមួយនេះ « យើងសោកស្តាយ
យើងទាំងអស់គ្នា សង្គមស៊ីវិល នឹងធ្វើពហិការ គឺចាប់ពីក្រុមរបស់យើងនេះទៅ
គឺឈប់ប្រើប្រាស់នូវផលិតផលវៀតណាម អំពាវនាវដល់ប្រជាពលរដ្ឋខ្មែរដែរ
និងប្រជាពលរដ្ឋពិភពលោកទាំងអស់ សូមឲ្យលើកកម្ពស់សិទ្ធិមនុស្ស
ឈប់ប្រើប្រាស់ផលិតផលវៀតណាម ប្រសិនបើគាត់ (ប្រទេសវៀតណាម)
មិនគោរពសិទ្ធិមនុស្ស មិនទទួលញត្តិសំណូមពរយើង ឲ្យគោរពសិទ្ធិមនុស្ស។»
ព្រះតេជគុណ លួន សុវ៉ាត
ម្ចាស់ពានរង្វាន់ការពារសិទ្ធិមនុស្សអន្តរជាតិ
មានសង្ឃដីកាខកចិត្តនឹងស្ថានទូតមួយនេះ ដោយថា បើទោះបីជាស្ថានទូតនេះ
អសមត្ថភាពអន្តរាគមន៍លើបញ្ហានេះ តែគប្បីចេញមុខមកបំភ្លឺលើការបដិសេធ
មិនគួរណាមិនអើពើនោះទេ ព្រោះយុទ្ធនាការដាក់ញត្តិនេះ
មិនមែនជាទង្វើខុសច្បាប់ឡើយ «បើថាមិនបានជួយអ្វី
ក៏យកញត្តិទៅក្រវេញចោល ទៅដាក់សំរាម ក៏យើងចាត់ទុកថា ជាការសមគួរ
ព្រោះក្នុងញត្តិនោះ អត់មានអ្វីដែលជាការខុសច្បាប់ទេ ច្បាប់ជាតិ
ច្បាប់អន្តរជាតិ និងច្បាប់ស្ថានទូត។ ស្ថានទូត (វៀតណាម)
ហាក់ដូចជាមើលងាយញត្តិនោះ គឺហាក់បីដូចជាដៃរបស់គាត់ ថ្លៃថ្នូរជាងក្រដាសពីរ
បីសន្លឹកហ្នឹង គាត់មិនហ៊ានប៉ះ គាត់មិនហ៊ានកាន់ ហើយមាត់របស់គាត់
ក៏មិនហ៊ានចេញមកបកស្រាយ
រ៉ាយរ៉ាប់ប្រាប់តំណាងអង្គការផ្សេងៗថាមូលហេតុអ្វី។»
VOD មិនទាន់អាចសុំការឆ្លើយតបពីលោក ឡេ មិញង៉ុក អ្នកនាំពាក្យស្ថានទូតវៀតណាមប្រចាំកម្ពុជា បាននៅឡើយទេ។
អ្នកសម្របសម្រួលបណ្តាញរួបរួម ដើម្បីគណនេយ្យភាពសង្គមអាស៊ីបូព៌ា
និងប៉ាស៊ីហ្វិក លោក សន ជ័យ យល់ថា ករណីនេះ
អាចជាការខាតបង់ធំមួយរបស់ប្រទេសវៀតណាម ព្រោះបច្ចុប្បន្នកម្ពុជា
មានទីផ្សារនាំចូលទំនិញពីបរទេសច្រើន
ដូចនេះលទ្ធភាពនៃប្តេជ្ញាចិត្តរបស់ពលរដ្ឋ អាចទៅរួច
ហើយនឹងមានឥទ្ធិពលខ្លាំងលើប្រទេសមួយនេះ «ទង្វើដែលវៀតណាម
មកលើអ្នកដាក់ញត្តិ ខ្ញុំគិតថា ជាការខាតបង់ដ៏ធំមួយ ហើយបើគ្រប់គ្នា
នាំគ្នាបដិសេធនោះ ទីផ្សារផលិតផលវៀតណាម នឹងមានការគាំទ្រថយចុះ ហើយពេលនោះ
អ្នកដែលខាតបង់ជាងគេ គឺវៀតណាមហ្នឹងឯង ខណៈពេលនេះពលរដ្ឋកម្ពុជា
កំពុងសម្លឹងយ៉ាងយកចិត្តទុកដាក់លើឥរិយាបថរបស់វៀតណាម មកលើកម្ពុជា។»
កាលពីចុងខែមករា ស្ថានទូតមួយនេះ
ក៏ធ្លាប់បានបដិសេធទទួលយកញត្តិរបស់អង្គការសង្គមស៊ីវិលម្តង
រួចមកហើយ ដែលស្នើអន្តរាគមន៍ដោះលែង អ្នកទាំង២៣នាក់នេះ
ដោយលើកហេតុផលថា ជាពេលជិតចូលឆ្នាំប្រពៃណីវៀតណាម៕
សូមសរសេរមកលោក តាំង វីដា តាមរយៈ vida@vodhotnews.com
No comments:
Post a Comment