លោកនាយករដ្ឋមន្ត្រី ហ៊ុន សែន នៅថ្ងៃអង្គារនេះ ព្រមានតបតនឹងការធ្វើបាតុកម្មរបស់គណបក្សសង្គ្រោះជាតិ នៅទីលានប្រជាធិបតេយ្យ រាជធានីភ្នំពេញ ដើម្បីជាការបង្ហាញសិទ្ធិ និងឆន្ទៈរាស្ត្រ ដែលគាំទ្រគណបក្សប្រជាជនកម្ពុជា។
ក្នុងពិធីសម្ពោធរោងចក្រអគ្គិសនីប្រើដោយថាមពលធ្យូងថ្ម នៅខេត្តព្រះសីហនុ លោក ហ៊ុន សែន មានប្រសាសន៍ អ្នកគាំទ្រ និងអ្នកប្រឆាំង មានសិទ្ធិដូចគ្នាក្នុងការធ្វើបាតុកម្ម តែនាយករដ្ឋមន្ត្រីក្នុងនាមជាអ្នកដឹកនាំប្រទេស មានតួនាទីក្នុងការពារ និងធានាសិទ្ធិរបស់ប្រជាពលរដ្ឋ។ លោកបន្តថា គណបក្សប្រឆាំង តែងតែលើកឡើងពីឆន្ទៈរបស់រាស្ត្រ តែពលរដ្ឋដែលគាំទ្រគណបក្សប្រជាជនកម្ពុជា ក៏មានឆន្ទៈផងដែរ។
លោកនានយរដ្ឋមន្ត្រី ឲ្យដឹងទៀតថា ការជួបជុំនៅទីលានប្រជាធិបតេយ្យ នឹងមានមនុស្សពីរក្រុម គឺអ្នកគាំទ្រគណបក្សប្រជាជនកម្ពុជា និងគណបក្សប្រឆាំង ហើយការអនុញ្ញាត ឬមិនអនុញ្ញាត គឺអាស្រ័យលើសាលារាជធានីភ្នំពេញ។ លោកបន្តថា រាជរដ្ឋាភិបាល មិនបណ្តោយឲ្យគណបក្សប្រឆាំង ធ្វើអ្វីតាមតែចិត្តនោះទេ។ លោកបញ្ជាក់ថា លោកមិនសំណូមពរឲ្យពលរដ្ឋធ្វើបាតុកម្មនោះទេ តែលោកក៏មិនហាមឃាត់សិទ្ធិពលរដ្ឋក្នុងការធ្វើបាតុកម្មដែរ។
ការប្រកាសបែបនេះ ហាក់បង្ហាញថា លោកនាយករដ្ឋមន្ត្រី បើកឲ្យមានការធ្វើបាតុកម្មឡើងវិញ បន្ទាប់ពីការបំបែកការជួបជុំមនុស្ស ត្រូវបានធ្វើឡើងជាបន្តបន្ទាប់ និងកំពុងរងការរិះគន់ពីសង្គមស៊ីវិលជាតិ និងអន្តរជាតិ។
គួរបញ្ជាក់ថា បន្ទាប់ពីការបោះឆ្នោតកាលពីខែកក្កដា ឆ្នាំ២០១៣ គណបក្សសង្គ្រោះជាតិ ប្រកាសមិនទទួលស្គាល់លទ្ធផលបោះឆ្នោត និងធ្វើបាតុកម្មជាបន្តបន្ទាប់។ ប៉ុន្តែក្នុងរយៈពេលចុងក្រោយនេះ បាតុកម្មរបស់គណបក្សប្រឆាំង ត្រូវបានបង្ក្រាប និងហាមឃាត់៕
No comments:
Post a Comment