កម្មកររោងចក្រ ធ្វើកូដកម្មនៅមុខក្រសួងការងារ ដើម្បីស្នើសុំដំឡើងប្រាក់ខែគោល ១៦០$ នាពេលកន្លងមក (រូបថត៖ តាត ឧត្តម)
ដោយ៖ ជន ស្រីណុច | ថ្ងៃចន្ទ ទី24 ខែកុម្ភៈ ឆ្នាំ2014 | 15 នាទី មុនVOD
ក្រសួងការងារអំពាវនាវនៅថ្ងៃចន្ទនេះ ឲ្យកុំឲ្យកម្មករ-កម្មការិនី ចូលរួមធ្វើកូដម្មជាមួយសហជីព និងសមាគមទាំង១៨ ដែលទាមទារឲ្យដោះលែងអ្នកជាប់ឃុំ២១នាក់ និងដំឡើងប្រាក់ឈ្នូលកម្មករដល់១៦០ដុល្លារ ។
ការអំពាវនាវនេះធ្វើឡើង ស្របពេលដែលសហជីព និងសមាគមចំនួន១៨ ចែកខិត្តប័ណ្ណ ទៅដល់កម្មករ ដើម្បីចូលរួមធ្វើកូដកម្មទូទាំងប្រទេស ចាប់ផ្តើមពីថ្ងៃទី១២ ខែមីនា ឆ្នាំ២០១៤ ក្នុងបំណងទាមទារឲ្យរដ្ឋាភិបាល និងនិយោជកដោះស្រាយបញ្ហាចំនួន៧ចំណុច ក្នុងនោះ សុំឲ្យដោះលែងអ្នកទាំង២១នាក់ និងសុំដំឡើងប្រាក់ឈ្នួលអប្បបរមា១៦០ដុល្លារដល់កម្មករ។
អ្នកនាំពាក្យក្រសួងការងារលោក ហេង សួរ ប្រាប់ VOD នៅរសៀលថ្ងៃចន្ទទី២៤ ខែកុម្ភៈនេះថា កម្មករ-កម្មការិនីទាំងអស់ គួរគិតគូរ ឬពិចារណាឲ្យច្បាស់ ដើម្បីប្រយោជន៍ការងាររបស់ខ្លួន គឺមិនត្រូវ ចូលរួមធ្វើកូដកម្មអីនោះទេ។ លោកបន្តថា រឿងប្រាក់ឈ្នូលក្រសួងកំពុងតែធ្វើការស្រាវជ្រាវ និងសិក្សារកចំណុចរួមមួយដើម្បីឲ្យកម្មករ ក៏ដូចជានិយោជកអាចទទួលយកបានទាំងសងខាង ។
ប្រធានសហព័ន្ធសហជីពកម្មករចំណីអាហារ និងសេវាកម្មកម្ពុជា លោក ស មូរ៉ា មានប្រសាសន៍ថា ក្រសួងតែងតែលើកពេលជានិច្ច ចំពោះកិច្ចការដំឡើងប្រាក់ឈ្នួលរបស់កម្មករ ដោយមិនមានពេលណាមួយជាក់លាក់ទេ។ លោកបន្តថា ប្រសិនបើក្រសួងដាក់ពេលវេលាឲ្យច្បាស់លាស់ សម្រាប់ការចរចាប្រាក់ឈ្នួលកម្មករ នោះសហជីពនឹងផ្អាកភ្លាម។
ប្រធានសហព័ន្ធសហជីពចលនាកម្មករ លោកប៉ាវ ស៊ីណា មានប្រសាសន៍ថា ក្រសួងមិនគួរអំពាវឲ្យកម្មករមិនចូលរួមទាមទារប្រាក់ឈ្នួលនោះទេ ព្រោះនេះជាសិទ្ធិរបស់ពួកគេ បើក្រសួងមិនចង់ឲ្យពួកគេចូលរួមបាតុកម្មទេ ក្រសួងត្រូវតែឆ្លើយតបទៅនឹងតម្រូវការរបស់ពួកគេ មិនមែនពន្យារពេលរហូតបែបនេះទេ។ លោកបន្តថា ការដែលក្រសួងលើកឡើងថា កំពុងតែធ្វើការសិក្សាទាក់ទងនឹងប្រាក់ឈ្នួលកម្មករ គ្រាន់តែជាលេសមួយប៉ុណ្ណោះ ។
មេដឹកនាំសហជីព និងសហគមទាំង១៨ កំពុងតែធ្វើការចែកខិត្តប័ណ្ណ ដោយអំពាវនាវឲ្យកម្មករ-កម្មាការិនីចូលធ្វើកូដកម្មដែលនឹងចាប់ផ្តើមនៅថ្ងៃទី១២ ខែមីនាខាងមុខនេះ ដោយពួកគេសង្ឃឹមថា នឹងមានអ្នកចូលរួម លើសពី២០ម៉ឺននាក់ ៕
សូមសរសេរមកកាន់កញ្ញា ជន ស្រីណុច តាមរយៈ chornsreynoch@vodhotnews.com
No comments:
Post a Comment