ដោយ តាំង សារ៉ាដា / 01-7-2012 - RFA
រដ្ឋាភិបាលកម្ពុជា បានបង្ហាញក្ដីសង្ឃឹមដ៏មុតមាំរបស់ខ្លួន ក្នុងការបង្កើតតំបន់ត្រីកោណអភិវឌ្ឍន៍សេដ្ឋកិច្ចពិសេសរួមគ្នាជាមួយប្រទេសវៀតណាម និង ឡាវ នោះថា នាំមកនូវភាពចំរើនរុងរឿងដល់ជីវភាពរស់នៅរបស់ពលរដ្ឋក្នុងតំបន់ភូមិភាគឦសានរបស់ខ្លួន។
ប៉ុន្តែក្រុមអ្នកឃ្លាំមើលអំពីបូរណភាពទឹកដីបានសម្ដែងក្ដីបារម្ភថា ការបង្កើតតំបន់មុំបី ឬហៅថា CLV នេះ អាចនាំឲ្យកម្ពុជា បាត់បង់ធនធានធម្មជាតិ និងទឹកដីរបស់ខ្លួនដ៏ធំធេងទៅឲ្យប្រទេសវៀតណាម នៅថ្ងៃមុខ។
លោកនាយករដ្ឋមន្ត្រី ហ៊ុន សែន កាលពីចុងខែឧសភា បានសម្ដែងមោទនភាព និងមហិច្ឆតារបស់ខ្លួនថា ការបង្កើត តំបន់ត្រីកោណអភិវឌ្ឍន៍ពិសេស រវាងកម្ពុជា វៀតណាម ឡាវ។ លោកចាត់ទុកថា គម្រោងនេះ ជាគន្លឹះមួយដ៏សំខាន់ ដើម្បីកាត់បន្ថយភាពក្រីក្រ តាមរយៈការវិនិយោគ លើវិស័យទេសចរណ៍ កសិ-ឧស្សាហកម្ម រ៉ែ និងទំនប់វារីអគ្គិសនី។
កាលពីខែធ្នូ ឆ្នាំ២០១១ កម្ពុជា បានយល់ព្រមដាក់បញ្ចូល ខេត្តរបស់ខ្លួនចំនួន ៤ មាន ខេត្តក្រចេះ ស្ទឹងត្រែង រតនគិរី និង មណ្ឌលគិរី ដែលមានពលរដ្ឋប្រហែលជាង ៥ សែននាក់។ រីឯប្រទេសឡាវ ក៏បានដាក់បញ្ចូលទឹកដីរបស់ខ្លួនចំនួន ៤ ខេត្តដែរ ដូចជាខេត្ត អាតាពើរ (Ataper) ចំប៉ាសាក់ (Champasak) សារាវ៉ាន់ (Saravan) សេកុង (Sekong) ដែលមានមនុស្សប្រមាណ ៧សែននាក់ ហើយវៀតណាម បានដាក់បញ្ចូលទឹកដីរបស់ខ្លួនចំនួន ៥ គឺខេត្តចាឡាយ (Gia Lai) កនទុំ (Kon Tum) ដាក់ឡាក់ (Dac Lac) ដាណាង (Da Nang) ប៊ិញហ៊្វឺក (Binh Phuoc) ដែលខេត្តទាំងនេះ មានមនុស្សជាង ៧លាននាក់។
